Wedi'i yrru gan bwrpas, wedi'i bweru gan angerdd

Gwneud i bobl ifanc deimlo'n saff

Mae Area 43 yn sefydliad cymorth iechyd meddwl ieuenctid annibynnol sy’n gweithredu yng ngorllewin Cymru ers dros 25 mlynedd. Mae ein hethos a arweinir gan bobl ifanc yn llywio ein gwaith, ac yn grymuso a chefnogi hawliau pobl ifanc i gael mynediad at wasanaethau cyngor, cwnsela a chymorth lleol o ansawdd uchel sy’n seiliedig ar dystiolaeth i wella eu cyfleoedd bywyd ar gyfer dyfodol gwell. Rydym yn gweithio mewn partneriaeth â phobl ifanc ac eraill i hyrwyddo datblygiad gwasanaethau rhad ac am ddim sy’n canolbwyntio ar bobl ifanc ac sy’n cael eu harwain gan anghenion.

Mae’r sefydliad yn darparu gwasanaethau cwnsela proffesiynol, cyfrinachol, annibynnol yn y gymuned ac mewn ysgolion i blant a phobl ifanc 4-30 oed yng Ngheredigion, Sir Gaerfyrddin, Powys a gogledd Sir Benfro.

Safle saff i siarad

Mae gwasanaethau Area 43 wedi’u tanategu gan ethos sy’n canolbwyntio ar yr unigolyn, ac sy’n cydweithio â phobl ifanc, y gymuned, a darparwyr gwasanaethau eraill i ddatblygu gwasanaeth sy’n gosod diogelu a llesiant wrth wraidd ei ddarpariaeth.

Mae gwasanaethau cwnsela bob amser wedi bod wrth wraidd ein holl ddarpariaeth gwasanaeth, ac yn atal pobl ifanc rhag angen gwasanaethau argyfwng. Mae ein tîm o gwnselwyr arbenigol a goruchwylwyr clinigol tra hyfforddedig yn sicrhau bod pobl ifanc yn ein hardaloedd sy’n darparu gwasanaethau yn cael mynediad at gwnsela cyfrinachol, rhad ac am ddim pan fydd ei angen arnynt.

Gwrando ar leisiau'r ifanc

Ers y pandemig rydym wedi gweld galw cynyddol am wasanaethau iechyd meddwl, ac roeddem am fod yn barod i ddiwallu anghenion pobl ifanc. Fe wnaethom greu cyfeiriad strategol a oedd yn cynnwys ethos a gweledigaeth a arweinir gan bobl ifanc ar gyfer gwasanaethau a oedd yn symud tuag at wasanaethau ataliol.

Mae Depot yn ganlyniad i ethos a arweinir gan ieuenctid Area 43. Ar ddechrau 2021, yn sgil cau llawer o wasanaethau iechyd meddwl ar gyfer ieuenctid, roedd Area 43 am ddeall beth oedd ei angen ar bobl ifanc nawr i fynd i’r afael â’u tirwedd ôl-bandemig.
Daeth yr ateb yn ôl, yn uchel ac yn glir! Yn dilyn ymgynghoriad â’n cymuned ifanc, gydag ymatebion gan y rhai a oedd wedi defnyddio’n gwasanaethau a’r rhai a oedd heb – roeddent oll yn dweud yr un peth. Y bobl ifanc hynny oedd yr arbenigwyr yn eu hiechyd meddwl eu hunain, a’r hyn yr oedd ei angen arnyn nhw oedd y gallu i lunio gwasanaethau yn ôl yr angen.

Datblygu Depot

Roedde e nhw am ymyrraeth gynnar, anghlinigol, heb stigma, mynediad agored mewn materion a oedd yn effeithio ar eu llesiant, ac felly eu hiechyd meddwl ehangach.

Roedden nhw am gael safle saff, wedi’i hwyluso gan weithwyr proffesiynol dibynadwy, a oedd yn anffurfiol eu natur, i feithrin perthnasoedd a rhwydweithiau cymorth ymhlith eu cyfoedion, i gael cyngor gan bobl y gellir eu cysylltu â nhw y gellir ymddiried ynddyn nhw, a lle bo angen yn cael eu harwain at ymyriadau mwy ffurfiol.

Ar ôl clywed y cais, aethom ni yn Area 43 ati i weithio gyda phobl ifanc i greu Depot…

Lle ar y stryd fawr

Roedd pobl ifanc am fod yn rhan o’r gymuned, roedden nhw am gael eu gweld, cael safle a oedd yn unigryw iddyn nhw, un croesawgar wrth wraidd y gymuned. Fe wnaethon nhw weithio gyda ni i godi arian ar gyfer prynu adeilad mawr i gartrefu ein prosiect uchelgeisiol ar y Stryd Fawr yng nghanol tref Aberteifi.

Y cam nesaf – roedd angen enw ar y prosiect. Awgrymodd a phleidleisiodd y bobl ifanc ar yr enw Depot, yn rhannol i adnabod gwreiddiau ein hadeilad fel yr hen ddepo swyddfa bost, ond hefyd i gynrychioli’r ffordd yr oedden ni’n creu gorsaf ym mywydau pobl ifanc… stop ar daith wych.

O’r fan honno nid ydym wedi edrych yn ôl ac mae’r bobl ifanc yn rheoli pob agwedd o’r gwasanaeth, o’r cod ymddygiad ar gyfer y safle, y gwasanaethau a ddarperir, y gweithgareddau sy’n digwydd a sut yr ydym yn darparu’r cymorth y mae mawr ei angen ar bobl ifanc ein cymuned.

Depot fel Canolfan Cefnogi Cynnar

Roedd pobl ifanc am ganolfan i fynd i’r afael â phob maes sy’n effeithio ar eu hiechyd meddwl, a dyma ni. Mae partneriaid yn gweithredu o’r safle, rydym yn darparu cymorth cyflogaeth, yn ogystal â gwasanaethau a chymorth iechyd meddwl ataliol. Depot yw’r rhwydwaith cymorth y dywedodd pobl ifanc fod ei angen arnynt…a nawr mae ein pobl ifanc am helpu eraill!

Dros y ddwy flynedd ddiwethaf mae ein pobl ifanc wedi bod yn cynghori eraill ar yr hyn sy’n gwneud Depot mor arbennig iddyn nhw. Maen nhw wedi cynhyrchu rhaglenni dogfen, ysgrifennu ceisiadau am arian, lobïo gwleidyddion a lansio gwasanaethau newydd yn seiliedig ar yr hyn a wnaethant yma yn Depot.

Os hoffech chi ddarganfod sut wnaethon nhw hynny a dilyn eu taith wrth newid y byd, dilynwch eu taith ar ein sianel cyfryngau cymdeithasol. Fel arall, os ydych chi dan 25 oed, galwch draw i weld drosoch eich hun pam fo Depot yn golygu cymaint i’r gymuned y mae’n ei gwasanaethu!